बर्दिया, फागुन ७ — ७६औँ प्रजातन्त्र दिवसका अवसरमा बर्दिया जिल्लामा भव्य तथा गरिमामय कार्यक्रम आयोजना गरिएको छ। विक्रम संवत् २००७ सालमा सम्पन्न ऐतिहासिक आन्दोलनले १०४ वर्ष लामो निरंकुश राणाशासनको अन्त्य गर्दै देशमा प्रजातन्त्र स्थापना गरेको स्मरणमा हरेक वर्ष फागुन ७ गते यो दिवस मनाइँदै आएको छ।
जनताको बलिदान, वीर–वीरांगना शहीदहरूको अदम्य साहस र त्यागबाट स्थापित प्रजातन्त्रले राज्यशक्तिको स्रोत जनता नै हुन् भन्ने मान्यतालाई संस्थागत गरेको ऐतिहासिक उपलब्धिको रूपमा आजको दिनलाई सम्मानपूर्वक स्मरण गरिएको छ। प्रजातन्त्रकै आधारमा विकसित हुँदै मुलुक संघीय लोकतान्त्रिक गणतन्त्रात्मक शासन व्यवस्थामा रूपान्तरण भइसकेको सन्दर्भमा लोकतान्त्रिक मूल्य–मान्यता संरक्षण, विधिको शासन सुदृढीकरण र पारदर्शी प्रशासन प्रवर्द्धनमा एकजुट हुन आह्वान गरिएको छ।
जिल्ला सदरमुकाममा आयोजित समारोहमा प्रमुख अतिथि प्रमुख जिल्ला अधिकारी गोगन बहादुर हमालको विशेष उपस्थिति रहेको थियो भने जिल्ला समन्वय समिति प्रमुख कृष्ण बहादुर बिष्टको अध्यक्षतामा कार्यक्रम सम्पन्न भएको हो।
कार्यक्रममा जिल्ला प्रहरी कार्यालय, सशस्त्र प्रहरी बल, विभिन्न सरकारी कार्यालयका प्रमुख तथा कर्मचारीहरूको उल्लेखनीय सहभागिता रहेको थियो।
कार्यक्रम राष्ट्रिय गान तथा झण्डोत्तोलनबाट सुरु भएको थियो। त्यसपछि शुभकामना मन्तव्य व्यक्त गर्दै वक्ताहरूले शहीदहरूको योगदानको उच्च कदर गरेका थिए। लोकतन्त्रको रक्षा, सुशासनको प्रवर्द्धन, पारदर्शिता र जनउत्तरदायित्व सुदृढ गर्दै नागरिकमैत्री सेवा प्रवाह सुनिश्चित गर्ने प्रतिबद्धता व्यक्त गरिएको थियो।
सहभागीहरूले प्रजातन्त्र दिवसलाई केवल ऐतिहासिक स्मरणको दिन नभई वर्तमान र भावी पुस्ताका लागि उत्तरदायी शासन प्रणाली निर्माण गर्ने संकल्प दिवसका रूपमा मनाउनुपर्ने धारणा व्यक्त गरेका थिए।
७६ वर्षअघि प्राप्त प्रजातान्त्रिक उपलब्धिलाई व्यवहारमा रूपान्तरण गर्दै विकास, समृद्धि र सामाजिक न्याय सुनिश्चित गर्ने सामूहिक प्रतिबद्धतासहित बर्दियामा ७६औँ प्रजातन्त्र दिवस उल्लासपूर्वक सम्पन्न भएको छ।
