जयपति ढकाल नेपालगञ्ज, बाँके — खाद्य प्रविधि तथा गुण नियन्त्रण कार्यालय, नेपालगञ्जले विद्यालय क्षेत्रका क्यान्टिन तथा खाद्य व्यवसायमा सञ्चालन गरेको संयुक्त अनुगमनमा खाद्य स्वच्छता तथा सुरक्षित खाना व्यवस्थापनमा गम्भीर कमजोरी फेला परेको छ। अनुगमन टोलीले विद्यालय कक्षाभित्र रहेका क्यान्टिनदेखि लिएर नजिकैका भोजनालयसम्म निरीक्षण गर्दै सुधारका निर्देशहरू प्रदान गरेको हो।
प्रतिवेदनअनुसार केही क्यान्टिनमा भान्साको सरसफाइ कमजोर, भाँडा धुने स्थान अव्यवस्थित, तेल पटक–पटक पुनःप्रयोग गरिएको, तथा पत्रपत्रिकामा खाद्य वस्तु राखिएको भेटिएको छ। साथै, केही कर्मचारीको व्यक्तिगत स्वच्छता कमजोर र भण्डारण कक्ष असुरक्षित अवस्थामा रहेको पनि उल्लेख छ।
अनुगमनमा समावेश तीन व्यवसायमध्ये दुई—दिर्घायु खाजा घर तथा मोडर्न पब्लिक स्कूल क्यान्टिन—मा देखिएका गम्भीर अनियमितताका कारण तात्कालिक रूपमा सञ्चालन रोक्न निर्देशन दिइएको छ। आदर्श माध्यमिक विद्यालयले स्वयम् सञ्चालन गरेको क्यान्टिन भने सामान्य कमजोरीसहित सन्तोषजनक रहेको प्रतिवेदनमा उल्लेख छ।
कार्यालयले अनियमितता भेटिएका व्यवसायलाई निर्धारित समयभित्र सुधार अनिवार्य गर्ने र नभए कारबाही प्रक्रिया अघि बढाउने चेतावनी दिएको छ। टोलीले विद्यार्थीको स्वास्थ्य सुरक्षाका लागि विद्यालय क्यान्टिनमा स्वच्छता मापदण्ड कडाइका साथ पालना गर्न आग्रह गरेको छ।
