काठमाडौँ, जेठ २८ गते । सिरहाको नवराजपुर गाउँपालिकाका तत्कालीन अध्यक्ष विश्व मोहन प्रसाद यादवसहित १४ जनाविरुद्ध १४ लाख ५१ हजार ५५१ रुपियाँ भ्रष्टाचार मुद्दा दायर भएको छ ।
अख्तियार दुरुपयोग अनुसन्धान आयोगका प्रवक्ता नरहरि घिमिरेका अनुसार आर्थिक वर्ष २०७७/७८ मा सिरहाको नवराजपुर गाउँपालिका वडा नं. २ स्थित रामजानकी दलित आधारभूत विद्यालय मझौराको अपुरो कार्य पूरा गर्ने योजनामा विद्यालय भवनको नभए नगरेको कामलाई भए गरेको भनी कार्य सम्पन्न प्रतिवेदन र उपभोक्ताको बिलमा झुटा मुल्याङ्कन चढाइ भुक्तानीका लागि सिफारिस गरिएको छ ।
यादवसहित गाउँपालिकाका तत्कालीन उपाध्यक्ष शोभा कुमारी यादव, तत्कालीन योजना शाखा प्रमुख रमेश कुमार निधि, जिन्सि प्रमुख संजय प्रसाद यादव, वडा नं. ४ का वडा अध्यक्ष मदन यादव, वडा नं. ५ का वडा अध्यक्ष मनोज कुमार यादव, वडा नं. २ का वडा अध्यक्ष खुशिलाल साहविरुद्ध भ्रष्टाचार मुद्दा दायर भएको आयोगको विज्ञप्तिमा उल्लेख छ ।
यसैगरी, तत्कालीन प्रमुख प्रशासकीय अधिकृत अमरेन्द्र कुसियैत, लेखापाल सोमप्रसाद आचार्य, इन्जिनियर कृष्णा साह, सव–इन्जिनियर सन्तोष कुमार यादव, उपभोक्ता समितिका अध्यक्ष लक्ष्मीनारायण मुखिया, कोषाध्यक्ष घुरनी देवी मण्डल र सचिव रामभरोसा मुखिया मलाहविरुद्ध भ्रष्टाचार मुद्दा दायर भएको आयोगले जनाएको छ ।
आयोगका अनुसार भ्रष्टाचार निवारण ऐन, २०५९ बमोजिम १४ लाख ५१ हजार ५५१ रुपियाँ बिगो रकम कायम गरी जरिवाना सजाय हुन मागदाबी लिइ सोमबार विशेष अदालत काठमाडौंमा आरोपपत्र दायर भएको छ ।
