रुकुम पश्चिम। रुकुम पश्चिमको बाँफिकोटमा दुई प्रहरी जवानमाथि कुटपिट भएको छ । ईलाका प्रहरी कार्यालय बाँफिकोटमा कार्यरत प्रहरी जवान महेन्द्र बहादुर शाही र हिमराज खड्कामाथि कुटपिट भएको हो ।
आईतबार बेलुका ७ बजेको समयमा बाँफिकोट गाउँपालिका ३ स्यार्पुमा डिउटीमा रहेका प्रहरीमाथि कुटपिट भएको जिल्ला प्रहरी कार्यालय रुकुम पश्चिमका प्रहरी निरीक्षक धर्मेन्द्र खड्काले जानकारी दिए ।
बाँफिकोट गाउँपालिका ५ का ३४ वर्षिय हिरालाल केसीलाई बाँफिकोट गाउँपालिका ३ का २७ वर्षीय गोबिन्द विक, वडा नम्वर ४ का २२ वर्षीय लक्ष्मण विक, २० वर्षीय सञ्जु खड्का लगायत अन्य १२/१३ जनाको समुहले कुटपिट गरेको उनको भनाइ छ ।
प्रहरीमाथि कुटपिट भएको सूचनापश्चात प्रहरी घटनास्थल पुगेको थियो । घटनास्थलमा पुगेर सम्झाई बुझाई गर्न खोज्दा उल्टै प्रहरीमाथि ढुङ्गा मुढा प्रहार गरेको निरीक्षक खड्काले बताए। कुटपिटबाट घाईते भएका प्रहरी जवान शाहीको ढाड र खड्काको टाउकोमा चोट लागेको छ ।
उपचारका लागि आईतवार राति जिल्ला अस्पताल सल्ले ल्याईएका उनीहरुलाई थप उपचारका लागि कोहलपुर मेडिकल कलेजमा लगिएको प्रहरीले जनाएको छ । प्रहरीमाथि कुटपिट गर्ने व्यक्तिहरु फरार रहेको र उनीहरुको खोजतलास भईरहेको प्रहरीको भनाई छ ।
