बाँके- बाँके र बर्दियासँग सीमाना जोडिएको भारतको बहराइच जिल्लाको नानपारामा शनिबार एकदिने संयुक्त बैठक सम्पन्न भएको हो ।
बाँके र बर्दिया जिल्लासँग सीमाना जोडिएको भारतको बहराइच जिल्लाका डिष्ट्रिक मजिष्ट्रेट (डिएम) मोनिका रानीको निमन्त्रणामा बाँके र बर्दियाका प्रमुख जिल्ला अधिकारीसहितका सुरक्षा प्रमुखहरुसँग शनिबार एकदिन भारतको नानपारामा संयुक्त काउन्टर पार्टस् बैठक सम्पन्न भएको बाँकेका प्रमुख जिल्ला अधिकारी श्रवणकुमार पोखरेलले जानकारी दिनुभयो ।
बहराइच जिल्लाका डिष्ट्रिक मजिष्ट्रेट (डिएम) मोनिका रानीको नेतृत्वको भारतीय सुरक्षा अधिकारीहरु बहराइचका जनपद प्रहरी प्रमुख प्रहरी उपरीक्षक (एसपी) तथा सीमा सुरक्षा बल (एसएसबी) तर्फबाट तीनवटा बटालियनका प्रमुखहरुसँगको बैठकमा नेपालको तर्फबाट बाँकेका प्रजिअ श्रवणकुमार पोखरलेलको नेतृत्वको सुरक्षा अधिकारीहरुले भाग लिनुभएको थियो ।
नेपालका तर्फबाट बर्दियाका सहायक प्रमुख जिल्ला अधिकारी मोहन अर्याल, बाँकेका प्रहरी प्रमुख प्रहरी उपरीक्षक सुवासचन्द्र बोहरा, सशस्त्र प्रहरीका सशस्त्र प्रहरी नायव उपरीक्षक विकास श्रेष्ठ र बर्दियाका प्रहरी प्रमुख प्रहरी उपरीक्षक सुधिर शाही, सशस्त्र प्रहरीका सशस्त्र प्रहरी उपरीक्षक हर्कबहादुर शाही सहभागी रहनुभएको प्रजिअ पोखरेलले जानकारी दिनुभयो ।
माघ ८ गते (२२ जनवरी) का दिन भारतको अयोध्यामा हुने श्रीरामको प्राण प्रतिष्ठा अनुष्ठान र २६ जनवरीका दिन हुने भारतको गणतन्त्र दिवसको समयमा सुरक्षा एवं सुदृढ कानुनी व्यवस्था बनाउने (सेक्युरिटी, ल र अर्डर) विषयमा दुई देशका सीमा सुरक्षा अधिकारीबिच छलफल भएको बताइएको छ ।
Kasturi Khabar
