नेपालगन्ज । नेपालगंजबाट क्षेत्रीय उडान सुरु गर्नका लागि पर्यटन मन्त्रालयले गृहकार्य सुरु गरेको छ।
पर्यटन मन्त्रालयबाट आइतबार भएको निर्णय अनुसार, नेपालगंजबाट भारतका विभिन्न सहरहरुमा उडान पहलका लागि परराष्ट्र मन्त्रालयलाई पत्राचार गरिने भएको छ।
पर्यटन मन्त्रालयका सहसचिव बुद्धिसागर लामिछानेले सद्भावना दूतका बारेमा पनि निर्णय गरेको बताए।
मन्त्रिस्तरीय निर्णयले यसअघि नियुक्त भएका पर्यटन सद्भावना दूतहरुलाई खारेज गर्ने भएको छ।
‘पर्यटन प्रवर्द्धक सम्बन्धी कार्यविधि २०७९’ अनुसार पहिले नियुक्त भएकाहरुको पद तत्काल खारेज भए पनि पछि पुन: नियुक्त हुनसक्ने छन्।
यसअघि पदको नामकरण सद्भावना दूत रहेकोमा अबको दिनमा पर्यटन प्रवर्द्धक नामको पद लागु हुने गरी निर्णय गरिएको उनले जानकारी दिए।
‘विदेशमा नियुक्त भएका पर्यटन सद्भावना दुत पदलाई खारेज गरेर पर्यटन प्रवर्द्धक पद लागू गरिने भएको छ,’ उनले भने, ‘नेपालगंज-भारतका विभिन्न सहरमा क्षेत्रीय उडान गर्न यस अघि पनि पहल भएको थियो। र यसमा सरकार पुनः लागिपरेको छ।’
हवाई रुट विस्तारका लागि मन्त्रालयले भारतीय प्राविधिकसँगको बैठक छिट्टै आयोजना गर्ने तयारी गरिरहेको उनले बताए। दुवै मुलुकको पर्यटन प्रवर्द्धन गर्ने उद्देश्यले यो योजनालाई पुनः परराष्ट्रमार्फत पहल गर्न लागिएको उनले बताए।
हाल नेपालगंज विमानस्थललाई क्षेत्रीय स्तरको बनाउनका लागि नागरिक उड्डयन प्राधिकरणले ३ अर्ब रुपैयाँ लागतमा काम सुरु गरिसकेको छ।
नेपालगंजमा नयाँ टर्मिनल भवन निर्माण कार्य सुरु भइसकेको छ। यो विमानस्थलमा ६ दशक पछिको यात्रु मुभमेन्ट अनुसारको अत्याधुनिक टर्मिनल भवन निर्माण गर्न लागेको हो।
