जयपति ढकाल
बाँके – बाँकेमा दुईवटा नयाँ कारागार स्थापना गरिएको छ । करोडौं लगानीमा निर्माण गरिएको कारागार संचालनमा ल्याउन नसक्दा जिल्ला कारागार बाँकेमा कोचाकोच गरेर क्षमता भन्दा दोब्बर कैदी बन्दी बस्न बाध्य छन् ।
बाँकेमा बैजनाथस्थित क्षेत्रीय कारागार र जानकी गाउँपालिकामा बनेको खुल्ला कारागारको सुविधासम्पन्न भवन प्रयाेगबिहिन छ ।
हाल संचालनमा रहेको जिल्ला कारागार बाँके जीर्ण छ । यहाँ क्षमता भन्दा बढी कैदीबन्दी छन् । बन्दीलाई बस्न, सुस्नका लागि प्रयाप्त स्थान छैन ।
पुराना संरचनामा क्षमता भन्दा दोब्बर बढी कैदीबन्दी राखिदा कैदीबन्दीले कोचाकोचको स्थितिमा निकै सास्तीपुर्ण दैनिकी व्यतित गर्नु परेको छ । ३५०
को क्षमता भएको बाँके कागारमा हाल ९९२ जना कैदीबन्दी छन् । १२० को क्षमता भएको बालसुधार गृहमा पनि क्षमताभन्दा बढी २५० बालकहरु रहेका छन् । जिल्ला प्रहरी कार्यालय बाँके, इलाका प्रहरी कार्यालय कोहलपुरमा पनि क्षमताभन्दा
बढी थुनुवाहरु रहेका छन् ।
अधिकारकर्मी प्रभातसिंह ठकुरीका अनुसार, एकातिर जिर्ण अवस्थामा रहेको बाँके कारागारमा क्षमताभन्दा बढी कैदीबन्दी राखिदा उनीहरुले सास्ती व्यहोरीरहेका छन् ।
‘उनीहरुको आधारभुत मानव अधिकार उपभोगमा समस्या परिरहेको छ भने अर्को तर्फ बाँके जिल्लाको नौवस्तामा झण्डै १० बिगाहको क्षेत्रफलमा तीन हजार
क्षमताको क्षेत्रीय कारागारको भौतिक संरचना निर्माण भएर पनि संचालनमा आउन सकेको छैन ।’ ठकुरीले भने,–‘ यस्तै ६ वर्ष अगाडी बाँकेको गनापुरमा भौतिक
संरचना निर्माण गरिएको खुल्ला कारागार समेत अहिलेसम्म सञ्चालनमा आउन सकेको छैन ।’
सुरक्षा ब्यारेक, कर्मचारी व्यवस्थापन, श्रोत साधनको व्यवस्थापन भै नसकेको क्षेत्रीय कारागार संचालन सञ्चालनमा आउन नसकेको बताउँदै ज्ञापनपत्रमा सरकारी अधिकारीबाट बेलाबखतमा छिटै संचालनमा आउने बताईए पनि कहिले देखि नौवस्ताको क्षेत्रीय कारागार संचालनमा आउने हो स्पष्ट गर्न माग गरिएको अधिवक्ता बसन्त गौतमले जानकारी दिए । बिषयको गम्भीरतालाई ध्यानमा राखेर सरोकारवाला पक्षसंग गम्भीरतापूर्वक छलफल गरेर समाधान
खोजिने बाँकेका प्रमुख जिल्ला अधिकारी बिपिन आचार्यले बताएका छन् ।
