नेपालगंज– एक बालकको एक महिनापछि भारतको उत्तर प्रदेश हापुरबाट आज उद्धार गरिएको छ ।
गत जेष्ठ महिना देखि हराएका सान्नी त्रिवेणी गाउँपालिका कालिकोट निवासी १२ वर्षीय बालकलाई शान्ति पुनर्स्थापना गृह, शाखा कार्यालय नेपालगंज, बाँकेले नयाँ दिल्ली स्थित नेपाली राजदूतावास र देहरादून स्थित हेल्पक्रस ट्रस्ट संस्था र भारतीय रेल्वे प्रहरीको सहयोग र सहकार्यमा उद्धार गरिएको गृहकी कार्यक्रम संयोजक सिर्जना गौतमले जानकारी दिनुभयो ।
उहाँका अनुसार, ति बालक बुवाको साथमा ट्रेनमा चढि भारतको दिल्ली प्रस्थान गएका थिए तर उनी गन्तव्यमा नपुग्दै ट्रेनमा बुवासँग छुट्टिएर अलपत्र परेका रहेछन ।
बालकको अभिभावकले खोजतलासको लागि शान्ति पुनर्स्थापना गृह, बाँकेमा निवेदन दिएको आधारमा खोजी गर्ने क्रममा भारतको उत्तर प्रदेश स्थित हापुरमा उक्त बालकलाई फेला पारिएको थियो । फेलापारी त्यहाँ स्थित बाल कल्याण समितिमा राखि आवश्यक कागजी प्रकृया पुरागरी ति बालकलाई आज स्वदेश फिर्ता गरिएको हो ।
उद्धार गरिएको बालकलाई जिल्ला प्रहरी कार्यालय महिला, बालबालिका तथा जेष्ठ नागरिक सेवा केन्द्र नेपालगंज, बाँके मार्फत आजै परिवारको जिम्मा लगाइएको गृहकी कार्यक्रम संयोजक सिर्जना गौतमले जानकारी दिनुभयो ।
