नेपालगन्ज, बाँके क्षेत्र नं. २ मा राप्रपाको तर्फबाट प्रतिनिधिसभा सदस्य उम्मेदवार डा. धवल शम्शेर राणाले यसपालीको निर्वाचन पहिलाको भन्दा फरक हुने बताएका छन् । उनले जनता धेरै सचेत भैसकेकाले यो क्षेत्र मा प्रतिस्पर्धा गरिरहेका उम्मेदवारहरु को कस्तो भन्ने कुरा जनताले राम्रोसंग बुझेको र चिनेको बताए । राप्रपा र एमालेका युवाहरुले आयोजना गरेको शुभकामना आदानप्रदान कार्यक्रम बोल्दै डा. राणाले आर्थिक प्रलोभनको लोभलालचले कोही नफस्ने उल्लेख गरे । उनले भने आज म जुन ठाउँमा उभिएर बोल्दै छु यो ठाउँमा ५/१० वर्षपछि तपाईं युवाहरु हुनुपर्छ मैले जीवनमा कहिले पनि गल्ती गरिन इमानदारी र नैतिकताको राजनीति गरिरहेका कारण म कोहीसंग डराउँदिन । उनले युवाहरू पनि इमानदार र नैतिकवान भएर लाग्न आव्हान गरे । युवाहरु भभिष्यको कर्णधार भएको कारण जिम्मेवारीका साथ राष्ट्र, राष्ट्रियता, राष्ट्रिय अखण्डता र सार्वभौमिकता रक्षाको लागि तालमेलका उम्मेदवारलाई जिताउन उनले आव्हान गरे । कार्यक्रममा प्रदेश ख का एमाले उम्मेदवार निरक गुरुङले ५/१० हजारले कसैको पनि जीवन परिवर्तन नहुने भन्दै बजार सुनिने पैसाको हल्लापछि नलाग्न आग्रह गरे । उनले बजारमा सुनिएको पैसाको हल्लाप्रती सचेत रहँदै त्यस्ता क्रियाकलाप निष्तेज पार्न युवाहरूलाई आव्हान गरे । उम्मेदवार गुरुङले सबै जात धर्म र सम्प्रदायको सम्मान र यश क्षेत्रको विकासको लागि एमाले र राप्रपा तालमेलका उम्मेदवारलाई जिताउन रात दिन नभनी लाग्न अनुरोध गरे । कार्यक्रममा राप्रपाका सहायक महामन्त्री ऋषिराज देवकोटाले युवाहरु परिवर्तनको संवाक भएकोले यसपटक यो क्षेत्रमा युवाहरूले चमत्कारी परिवर्तन गरेर छोड्ने विश्वास व्यक्त गरे । कार्यक्रममा नेकपा एमालेका केन्द्रीय सदस्य हारुन हल्वाइले मधेसका नाममा नेतृत्व गरेर गएका यस क्षेत्रका नेताले मधेसीजनताको लागि के गरे भन्दै प्रश्न गर्दै आफ्नो विकासमा मात्र सीमित भएकोले यसपालि जात धर्म र सम्प्रदायका नाममा हुने राजनीति रोक्न युवाहरुलाइ अनुरोध गरे । एमाले लुम्बिनी प्रदेश सदस्य हलिम शाह, राप्रपा युवा संगठन लुम्बिनी प्रदेश अध्यक्ष हुकुम केसी, एमाले नगर सचिव मोहित शाह, राप्रपाका युवा नगर अध्यक्ष रवि बर्मालगायतले यसपटक मंसिर ४ मा नयाँ नेतृत्व दिने प्रण गरे ।