नेपालगञ्ज – हरितालिका तीज पर्वको रौनक बढ्दै गर्दा बजारमा नयाँ-नयाँ गीतहरूको ओइरो लागेको छ। तर, कतिपय गीतमा उत्ताउलो शब्द र अशोभनीय दृश्य प्रयोग भई परम्परागत तीजको सांस्कृतिक गरिमा ओझेल पार्ने प्रवृत्ति देखिएको अवस्थामा मध्यपश्चिमकै मौलिक भाका “छिर्लिङ” मा आधारित तीज गीत सार्वजनिक भएको छ।
Udaya KC Tript युट्युब च्यानलमार्फत सार्वजनिक भएको यस गीतलाई दशकौं अघिदेखि लोकप्रिय रहेको “छिर्लिङ” भाकाको पुनर्जीवनको रूपमा लिइएको छ। मौलिकतालाई संरक्षण र प्रवर्द्धन गर्न गरिएको यो पहलका लागि गीतका प्रस्तोता उदय के.सी. “तृप्त” को प्रशंसा हुँदैछ।
हाल आन्तरिक राजस्व कार्यालय नेपालगञ्जमा कर अधिकृतको रूपमा कार्यरत के.सी. लामो समयदेखि निजामती सेवामा भए पनि संगीतप्रति उनको लगाव र संस्कृतिप्रतिको सम्मान यथावत छ। मौलिक संस्कृति लोप नहोस् भन्ने सोचका साथ उनले यस गीतको सर्जना तथा प्रस्तुति गरेका हुन्।
गीतमा सर्जक उदय के.सी.को शब्दसँगै मध्यपश्चिमको सांगीतिक गहनाकी रूपमा परिचित लोकप्रिय गायिका टिका पुन को सुमधुर स्वर रहेको छ, जसले गीतको आकर्षणलाई अझ बढाएको छ।
यो गीत हेर्न वा सुन्नको लागि यहाँ क्लिक गर्न सकिन्छ: https://youtu.be/GwCPD8tPi_Q?si=6VYURI25ofLhP9sW
