हिले, माघ १५ गते । धनकुटा सदरमुकामबाट तथ्याङ्क कार्यालय र पाख्रिबासमा रहेको राष्ट्रिय व्यावसायिक कृषि अनुसन्धान कार्यक्रमलाई सार्न लागिएको भन्दै धनकुटाका राजनीतिक दलले आन्दोलन घोषणा गरेका छन् ।
धनकुटा नगरपालिकाको सभाहलमा सोमबार पत्रकार सम्मेलनको आयोजना गर्दै जिल्लाका क्रियाशील पार्टीहरूले संयुक्त विज्ञप्ति जारी गर्दै विरोध गरेका हुन् । राजनीतिक दलले धनकुटामा रहेको तथ्याङ्क कार्यालय धनकुटामै राख्न र राष्ट्रिय व्यावसायिक कृषि अनुसन्धान कार्यक्रमलाई पाख्रिबास मै राख्न दबाब दिन भोलि माघ १६ गते धनकुटामा शान्तिपूर्ण र्याली गर्ने बताएका छन् ।
यस्तै कार्यालय सार्न लागेको विरोधमा राजनीतिक दल र जनप्रतिनिधिको भेलाले एक हप्ताभित्र सम्बन्धित मन्त्री तथा प्रधानमन्त्रीलाई ज्ञापन पत्र बुझाउने पत्रकार सम्मेलनमा जानकारी दिइएको छ । पत्रकार सम्मेलनमा बोल्दै पूर्वमन्त्री तथा सङ्घीय संसद् राजेन्द्रकुमार राईले सङ्घीय मन्त्रिपरिषद् बैठकले कार्यालय सार्ने निर्णय गरेकाले यो विषयलाई सदनका आफ्नो तर्फबाट सक्दो कुरा उठाउने बताउनुभयो ।
उहाँले निर्णय नसच्याउन्जेल सबै धनकुटेली एक हुनुपर्ने बताउँदै जुनसुकै खालका आन्दोलन हुने समेत बताउनु भयो । राजनीतिक दलहरूले पत्रकार सम्मेलनमा जारी गरेको विज्ञप्तिमा नेकपा (एमाले), नेकपा (माओवादी केन्द्र), राष्ट्रिय स्वतन्त्र पार्टी, राष्ट्रिय प्रजातन्त्र पार्टी, नेकपा (एकीकृत समाजवादी), जनता समाजवादी पार्टीका प्रतिनिधिले हस्ताक्षर गरेका छन् ।
