नेपालगन्ज : बैशाख ३० गते देशैभरी हुन लागेको स्थानीय तहको निर्वाचनको प्रचारप्रसारको कार्यक्रम लगभग सकिन लागेको छ । २७ गते राती १२ बजे पछि सुरु हुने मौन अवधी संगै चुनावी अभियान सकिदै छ ।
चुनाव घोषणा भए संगै हालसम्मको अवस्थामा बाँकेको खजुरा र खजुरा वडा नम्बर ३ जहिल्यै चर्चामा रह्यो । युवा पुस्तालाई एमालेले बिश्वास गरेको अध्यक्ष पद र खजुरा ३ मा स्वतन्त्र उम्मेदवार बिकास काउचा मगतलाई वडाबासीले देखाएको स्नेह चर्चा गर्ने लायकको छ ।
खजुरा ३ मा स्वतन्त्र उम्मेदवार बिकास काउचा मगर, एमालेबाट पुर्ण बहादुर भण्डारी र गठबन्धनबाट कांग्रेसका रमेश सिजाली प्रतिस्पर्धामा छन् । तर खजुरा ३ मा सबैभन्दा बढी चर्चा र वडाबासीको स्नेह स्वतन्त्र उम्मेदवार काउचा मगरले प्राप्त गरेका छन् ।
खजुरा तिनका अपबाद बाहेकका सबै युवा जमातको साथ मिलेको छ भने काउचालाई हरेक घरबाट एक एक दिन पालैपालो घरदैलो अभियानमा सघाउने अभियान पनि खजुरा ३ को बि गाउँ, धौलागिरी, क गाउँ र खजुरा बजार लाइनमा समेत चल्यो ।
सबै दल र सबै दलका उम्मेदवार मतदाताको घरदैलोमा पुगेकै थिए, त्यो उम्मेदवारको धर्म र अधिकार पनि हो, आफ्नो लागी मत माग्नु तर स्वतन्त्र उम्मेदवार बिकास काउचा मगर वडाबासीको घरदैलोमा पुग्दा देखिने दृश्य भने अनौठो प्राय हुन्थे ।
उनी जहाँ जहाँ पुग्थे, स्थानीयहरु थालिमा अबिर, अक्षता, दुबोको माला, खादा सहित उनको स्वागत संगै जितको आशिर्वाद दिएका हुन्थे ।
चुनावको मुखमा उम्मेदवार संग मतदाताको यस्तो दृश्य बिरलै देख्न पाइन्छ तर स्वतन्त्र उम्मेदवार बिकास काउचा मगरको हकमा हरेक दिन हरेक घरमा देखिने र दोहोरिने दृश्य थियो ।
आफुले निर्वाचन आयोगबाट पाएको चुनाव चिन्ह ‘खानेपानीको धारा’ अङ्कित झन्डा र राष्ट्रिय झण्डा सहित स्वतन्त्र रुपमा गाउँबाट निस्किएको ठूलो दलबल सहित चुनावी अभियान पनि आफैमा लोभलाग्दो थियो ।
त्यही दृश्य अनि माहोलकै कारण खजुरा ३ मा राजनैतिक दल र दलका उम्मेदवार हार नजिकको अनुभव गर्न थालेको नजिकका स्रोतले बताउन थालेका छन् ।
